Hennie en Natalie bederf die kinders

Hellloooooo al die mooi mense van Brackendal
Dis al weer sulke tyd – ek dink ons almal wonder hoe ons hierdie stoomtrein met die naam TYD kan keer om met ons weg te hardloop....!
So kom ons aan die einde van nog ‘n jaar. Ons is al 5 jaar aktief besig by Abraham Kriel en spesifiek 4 jaar by Huis Triblehorn. Dit voel vir my soos nou die dag dat ons die kamers gaan uitverf het, beddens versier het en die nuwe meisies verwelkom het!
Ons het al lekker saam gekuier, baie gedoen, ekstra werk by die huis gedoen en net die vreugde beleef van hierdie spesiale meisies, want aan die einde van die dag verskaf hulle meer plesier aan ons, sonder dat hulle dit weet. Ons wat so bevoorregd is om ons eie huise te hê, saam met ons families en vriende te kan kuier, veilig te kan wees, lekker te kan eet ens. Dis nie te sê die meisies bly nie lekker nie, of het nie genoeg kos om te eet nie en het nie vriende of familie nie. Dis net hoe en waarom hulle is waar hul vandag is – hartseer omstandighede wat nie hulle eie toedoen is nie. Ek gaan nie die besonderhede in detail gee nie, maar hierdie meisies het al soveel meer beleef in hul kort lewens, as wat ons ooit in ‘n hele leeftyd kon gedoen het - en ons sal nie hul lewens vir al die geld in die wêreld wil hê nie – as die waarheid vertel word. Hierdie is meisies wat deur die samelewing (en meer gereeld die mense vir wie hul die liefste is) seergemaak is – fisies, geestelik, verstandelik, emosioneel. Gelukkig is daar vir hul uitkoms by Huis Triblehorn en dit is net hier waar ons die verskil maak – ons maandelikse besoeke, uitstappies, bederf – bring weer by hierdie meisies ‘n “sense of being and belonging” terug en herstel hul vertroue in mense.
Behalwe vir ons maandelikse kuier op ‘n Saterdag oggend en die verjaarsdae vieringe, het oom Hennie en Tannie Natalie (met klein Divan nog in Tannie Natalie se maag) die meisies verskriklik bederf so ‘n paar Sondae terug met ‘n lekker braai, springkasteel, geskenkies en lekkers. Ons het so lekker gekuier, nie een van ons wou huiswaarts keer nie – selfs die reen kon nie die prêt en plesier bederf nie! Dit was awesome Oom Hennie en Ta’ Natalie, en ons wil net verskriklik dankie se.

Ons wil dan ‘n ieder en ‘n elk van jul uitnooi. Miskien volgende jaar kan ons elke maand so ‘n kuier met ‘n groep mense reel. Hierdie is nie “Sonja se projek” nie – dis ‘n “Brackendal projek” – (ek moet net met jul deel – nou die dag kom ek by iemand om goed vir die meisies op te tel – toe skree twee jong meisies vir hul ouma : “dis die tannie van die kinderhuis” – ek weet nie of dit uit vrees of opgewondeheid was nie !)

Brackendal doen alreeds, en kan soveel meer, ‘n verskil in hierdie kinders se lewens maak. Die aard van die kinders se verblyf in die huis (in ander woorde die tydperk wat hul in die huis spandeer) verander elke maand (dit is die Staat se beleid om kinders nie langer as twee jaar in die tehuise te hê nie – en dus moet die kinders se sake so gou moontlik deur die howe gevoer word om hul terug te plaas in normale omstandighede – hetsy terug by hul ouers, voster sorg of aanneming) en het ons in die laaste jaar baie meisies sien kom en gaan. Dit maak ons verjaarsdag klub moeilik – want nes jy dink jy gaan bederf – word die meisie uitgeskuif! Ons mag nie die proses bevraagteken nie – al wat ons doel is is om sonskyn in die meisies se lewens te bring. Om fisies betrokke te wees, want om net geld te gee is so maklik – en moet ons nie verkeerd verstaan nie – ons waardeer elke sent se donasies wat gemaak word, maar wat is lekkerder as om te gaan kuier, kombers op die gras te gooi, te sit en gesels – hande vas te hou en te hoor wat in hul lewens aangaan elke dag – hoe goed hul op skool doen en wat hul drome is en dan ‘n lekker stywe druk te gee en te kry aan die einde van die kuier! Ek gril sommer van die lekkerkry!

My uitnodiging dus vir volgende jaar is dat – as jou hart hard met jou na hierdie briefie gesels oor hierdie projek, jy met jou familie, vriende, omgeegroep, werks mense, sondagskool groep gesels – dan probeer ons om twaalf sulke geleenthede soos ons al hierdie jaar gehad het, te reel. So kan ons ons gestuurde roeping uitvoer. Alles wat ons doen is in die naam van die Here, en is dit tot groot seen vir die meisies – en tot jouself want jy is gehoorsaam aan die Here se opdrag.

Ons laaste projek vir die jaar is natuurlik weer die Kersfees pakkies – en vra ek baie mooi of jul kan help met donasies van kinder leesboeke (verkieslik nuut – ons kan die tweedehandse boeke wat ingesamel word in hul klein bibliotekie sit – maar ‘n nuwe boekie spesifiek vir elke meisie sal hul soveel meer spesiaal laat voel), badkamer goedjies (deodorant/tande borsels en tande pasta, sjampoo, bad seep, waslappies/ handdoeke, sanitere doekies) en laaste maar nie die minste nie – ‘n lekker sjokolade. Ons sal dit alles in mooi pakkies sit en dan Sondag die 6de Desember na kerk gaan oorhandig – en julle is natuurlik almal welkom om saam te gaan!!!
Ek los jul met ‘n “vredes groet”
Vrede vir julle – in wie God ‘n welbehae het
Want soveel as ons dit aan die weduwees en weses doen, soveel doen ons dit aan Hom”
(my eie woorde)
Baie “blessings vir julle
Sonja
 

Huis Triblehorn – 2008

Dit is alweer sulke tyd – die laaste paar maande van die jaar. In hierdie tyd kyk ‘n mens terug na wat jy deur die jaar gedoen het – besin oor wat jy wou doen – en of jy daardie lysie voltooi het.
Ons Abraham Kriel projek floreer te danke aan die bydraes van al die ooms en tannies en maaitjies by NG Brackendal. Sonder julle sou dit glad nie moontlik gewees het om hierdie meisies ‘n bietjie sonskyn te kon gee in ‘n anders donker wereld nie.
Ons kuns oggende en projekte het soveel vreugde verskaf. Die een wat die langste in my gedagtes sal bly is die Bederf oggend met ons senior lidmate toe die meisies die tannies met manikure en pedikure bederf het na ons ‘n lekker “sing saam” gehad het om die oggend mee af te skop.
Tussendeur was daar t-hemde geverf, ons het knoop en doop gedoen, juwele gemaak, kaartjies gemaak, geleer hoe om onsself te versorg, as gemeeskapsprojek lekkergoed gepak vir die Abraham Kriel Makietie Dag, teddiebere gaan kyk by die blommemark – en toe nog na die mooiste blomme ook gekyk.
Die verjaarsdae is ook bietjie anders aangepak hierdie jaar, waar daar elke twee maande eers ‘n gesamentlike partytjie gehou is vir die maaitjies wat in daardie twee/drie maande verjaar en dan is die maaitjie uitgeneem deur haar Brackendal Verjaarsdag familie vir nog bederf. Die meisies het dit verskriklik geniet en ons hoop om hierdie projek verder te neem volgende jaar.
Daar was bietjie hartseer ook die jaar met ‘n paar van ons ou maaitjies wat uit die huis uitgeskuif is as gevolg van logistieke verandering binne in die Abraham Kriel organisasie, maar hierdie verskuiwings is tot voordeel van ons maaitjies. Courtney is ook in hierdie tyd offisieel deur haar vakansie ouers (nie van ons gemeente) aangeneem en word dit beoog dat sy dan teen Desember permanent by hulle sal aansluit – ons wens haar en haar nuwe ouers Gods rykste seen toe op hierdie nuwe lewenspad.
Huidiglik is daar nege meisies in die huis : Samantha, Isabel, Ellinese, Jackie, Mariska, Alicia, Busi, Sammy en Bianca. Teen die tyd dat hierdie brief julle bereik, het ons meisies ‘n see vakansie gehad vanaf die 8ste tot die 15de November 2008. Dit is as verrassing vir hul gegee omdat hul so mooi aangepas het in die huis en het die bestuur van Abraham Kriel besluit dat dit hul manier is om die meisies te beloon. Die goeie aanpassing is deels te danke aan NG Brackendal se hulp met die mooi maak van die huis waar die kinders grootgemaak kan word in ‘n so na as moontlik huislike atmosfeer (en nie ‘n instansie met grys mure nie). Die teels wat deur Gert gele is maak voorwaar die huis ‘n spog huis en wil ons meisies dit so graag vir almal wys – hulle het ook duvets op hul bedjies wat geskenk is deur ‘n Brackendal gesin.
Ons laaste projek vir die jaar sal ‘n kerspartytjie vir die meisies wees. Ons beoog dat hierdie partytjie op die 22ste of 29ste November gaan plaasvind. As daar enigiemand is wat ‘n spesifieke bydrae vir hierdie prjek kan maak, sal ons dit verskriklik waardeer. (Ons wil weer ‘n klere pakkie met skoene aan elke meisie oorhandig met ‘n kuns aktiwiteit vir bederf) – die laaste dag vir enige bydraes vir hierdie projek sal dan die 8ste November wees – sodat ons kan finale reelings tref en verdure aankope doen, indien nodig – baie dankie by voorbaat vir u ondersteuning vir hierdie projek – ek weet sommer al klaar dat dit ‘n reuse sukses gaan wees.
Om af te sluit wil ek hiermee namens die meisies (en Elise en Marlien – die huis moeders) van Triblehorn vir ‘n ieder en elk van Brackendal wat bygedra het tot die sukses van die projek, en vir al jul gebede, dankie se, sonder julle sou dit nie moontlik gewees het nie. Ons is lank nie klaar met hierdie liefdesdaad nie en vra jul voortgesette gebede en ondersteuning om die projek ‘n nog groter sukses te maak. Enigiemand wat belangstel om bydraes te maak – van watter aard ookal, moenie huiwer om met my te gesels nie – “the more the merrier”.
Groete tot volgende jaar.
Sonja Blignaut
Namens Huis Triblehorn
Abraham Kriel

Nuusbrief -  Februarie tot Junie 2007

Kyk nou net hoe vinnig het die tyd alweer gevlieg! En ons is sooooo besig met lekker dinge.

Ons verjaarsdagklub is nou goed aan die gang. Ons wil net baie dankie se vir al die families en groepe wat ‘n dogtertjie borg vir hierdie spesiale dag!

Megan : 28 Maart : Fransie en gesin
Samantha : 28 April : Susan en gesin
Isabel : 2 Mei : Willem de Klerk omgeegroep
Esmaralda : 7 Mei : Adeline and Nardus Venter
Jeanetta : 15 Julie : Karen :
Courney : 31 Julie : Norbert & Charlotte Hilscher Omgee Groep
Maritza : 13 Augustus : Jan Pretorius en familie omgeegroep
Ellinese : 18 September : Sunette de Klerk
Jackie : 17 Oktober : Neil en Vivienne Longstaff & familie

Ons kuns oggende bring soveel genot! Ons het nou al dié jaar ‘n lekker krale dag gehad waar elke meisie vir haarself ‘n arm bandjie en “necklace” gemaak het. Kerk toe gaan en ander uitstappies word nou ‘n “brag” dag met al die fancy goedjies wat hul vir hulself gemaak het.

Saterdag die 14de April het Fransie en haar familie die dogters bederf met ‘n kruisie steek projek. Almal het iets nuuts geleer en hope prêt gehad. Baie dankie vir Fransie en haar familie vir die bederf!

Op ‘n unieke manier het ‘n groep Dinamika skool dogters ook hul skooltaak in die vorm van ‘n gemeenskapsprojek met ’n verskil met ons kom deel. ‘n Paasboodskap en paaseiers en geskenkies is uitgedeel. Die kinders kon hul oe nie glo! Baie dankie vir Juanita and haar groepie—julle was awesome!

Moedersdag was ‘n dag wat min van ons sal vergeet. Ons het die meisies gehelp om vir die huis ma’s ‘n ontbyt te bedien, tafels was mooi gedek en ons het almal aan muffins, yogurt, muesli en vrugte gesmul. Daar was trane in die tannies se oë!

Ook baie spesiaal was daar ‘n groep Marais Viljoen seuns wat met hul skoolgemeenskapsprojek die gras kom sny het, groetetuin kom skoonmaak het en nuwe plantjies geplant het—elke meisie het tuingereedskap as ‘n verrassing gekry. Dit is regtig fantasties hoe hierdie seuns ingeklim het—baie dankie! Ons wil ook net vir Renier en Adri dankie sê vir die tuinskoonmaak tydens hul gemeenskapsweek ter herdenking van klein Nico se wonderwerk.

Soveel goeie dinge kom uit hierdie liefdesprojek van ons. Die mammas van die Marais Viljoen seuns het gereel dat die meisies en huismammas se hare by ‘n salon gesny gaan word—hoe wonderlik is die Here nie!

Ons Kombers en Verwarmer projek was suksesvol bo ons wildste verwagtinge—binne vier dae het ons al die verwarmers en komberse wat ons nodig gehad het gekry—ons wil net baie dankie aan ‘n ieder en elk wat bygedra het sê. Ook dan so vir die Dippenaar seuns wat die verwarmers vir ons teen die mure monteer het!

Junie se kuns oggend het Fransie en haar familie weer gehelp en het ons uitnodigings kaartjies gemaak en pannekoek gebak. Baie dankie vir almal wat so help.

Ons beplan om die 7de Julie Dieretuin toe te gaan. As enige iemand kan help met donasies vir toegang geld en ietsie om te eet (20 persone @ R35 per persoon) sal dit regtig waardeer word!

JULIE MAAND IS VERJAARSDAG MAAND VIR ONS HUIS
Hamburgers, springkasteel, roomys, saam kuier en hope pret : 14 Julie 2007 : 11h00—14h00: RSVP ASB sodat ons genoeg kos het vir almal. Dit is gratis—maar as daar enigiemand wil donasies maak, sal ons dit regtig waardeer.

Groete tot volgende keer.

Baie dankie aan al die kruideniersware en donasies. Die nood hou nie op en alles word waardeer. Onthou om ‘n emmer te neem vir kruideniersware, of plaas sommer in die houer spesiaal gemerk vir hierdie projek.

KONTAK PERSOON : SONJA BLIGNAUT : 083-411-1754
 

DONASIES -  GROOT ASSEBLIEF

Soos alle instansies wat afhanklik is van donasies Het ons huis ook ‘n groot behoefte!
Enige kruideniers wat jy vir jou Huis sal koop, het hul ook nodig.
Vanaf wasgoed seep, suiker, toilet papier, pasta, sop, blikkies kos, badseep, tandepasta,
alles en nog wat – en ‘n bederf dingetjie sal darem ‘n groot Glimlag bring.

Alle kruideniers kan by die kerk-kantoor ingehandig word –  laat weet net dat dit spesifiek vir Abraham Kriel is,
of dit kan vir Sonja gegee word Sondae!
Geldelike donasies is ook baie welkom en kan of vir Sonja gegee word of direk by die kerk kantoor inbetaal word.
By voorbaat baie dankie vir al die ondersteuning, dit word regtig Waardeer!

Nuus

Kerspartytjie : 18 November 2006—16h00 tot laat.
En het ons toe lekker gekuier.
Ysbreker was “hangmannetjie”. Ons het baie hulp gehad en wil ons aan ‘n ieder en elk wat saam gekuier het, dankie sê! Ons het, toe die reen ophou, buite gaan speel. Eers het ons die nuwe klim en klouter bewonder – die kinders kan nie uitgespeel raak nie! Die eier/lepel resies en daarna eiergooi kompetisie was ‘n groot baljaardery – en verneukery! Ons het lekker gesmul aan braaivleis en slaaie. En toe kom die geskenk uitdelery – daardie nuwe klere – man – het die kinders dit waardeer! Elkeen sy eie – nie een dieselfde – ‘n groot bederf! Dries het ook van een van sy toergroepe ‘n geskenk uit Holland gekry – ‘n oom wie se vrou oorlede is – het sy oorlede vrou se juwele aan ons geskenk met die spesifieke opdrag om dit aan die meisies te oorhandig. Die meisies se oë het geskitter – meer as die stene in elke stukkie!

Roos tuin besoek – 3 Desember 2006
Mense – het Judes vir ons ‘n lekker dag bespreek – nie net die blomme nie – die weer en alles wat daarmee saamgaan. Ons het by Ludwig’s Rose, oppad Warmbad toe, gekuier. Ons het tot ‘n Mustang gehad wat die meisies soontoe gevat het – dankie baie vir Freddie en Amanda. Daar aangekom is ons geleer van rose plant, rose versorg, verskillende tipes rose – ‘n fees voorwaar. Die meisies het daarna hul eie roosboom gekies en toe in hul tuin geplant by die huis – ‘n pragtige herhinnering aan ‘n pragtige dag! Ek dink amper die grootmense het die dag nog meer geniet!

Hare Sny Dag : 27 Januarie 2007
Daar begin ons die nuwe jaar met ‘n nuwe baadjie (of haarstyl). Tjoef Tjaf– en al die hare is af! Elkeen kon sy eie styl kies – en Ronell – Blikkies se sussie – het kortemette van die langhare gemaak – en daarna is die nuwe styl drooggeblaas, gejel, ge-wax, you name it! Kyk asseblief na die “voor en na” foto’s agter in die kerk!