Mense, ons het hierdie vakansie die kans gehad om bietjie uit te reik buite ons grense, en om die minste te sê, dit was ‘n “eye opener”!
Een Sondag na kerk het ons bymekaar gekom en al die goed wat deur Brackendal geskenk is – kos, klere, skoene, boeke, komberse, speelgoed, noem maar op - uit te sorteer sodat ons Hennie se instruksie van God af kon help uitvoer – versorg die armes en haweloses. Hennie en sy span is met twee karre vol goed na The Hill toe waar hul dit by Fremar Ministries kon versprei met groot dankbaarheid. Daar was ‘n berg se goed eenkant toe gesit vir die CMR wat ook afgelewer is so met die winterkoue saam, en ons omgeegroep is na Emfuleni Lochvaal Welsyn toe met drie voertuie vol goed. Dit is ook nie blote toeval dat ons by Lochvaal uitgekom het nie – ons glo God het hierdie instansie aan ons uitgewys toe Gert en Alida die informasie blaadjie aan ons gegee het ter inligting – God is groot en almagtig – Hy het reeds vir ons die pad voorberei, ons moet net luister en begin doen.
Emfuleni Lochvaal huisves 80 hulp behoewende blanke mense op ‘n plot. Daar aangekom is ons hartlik gegroet en al die goedjies is met ‘n japtrap na die store geneem en inventaris gedoen sodat alles na die beste van hul vermoë versprei kan word onder die mense. Ons groepie is toe met trots deur die perseel geneem op ‘n toer waar ons die groente tuine kon waardeer, sien hoe skoon die kombuisie met die koolstowe is, hoe die tannie hard aan die werk is om klere reg te maak, hoe die ooms wegtimmer aan hout om heinings te bou ens, die kinders lekker in hul kamertjie speel / slaap waar die middag sonnetjie die plek verhelder, hoe 22 volwasse mans in ‘n kamer so groot soos ‘n dubbel garage met bunk beddens om ‘n TV saam kuier en die sokker kyk, hoe 12 vrouens met trots hul kamer (so groot soos ‘n enkel garage) met geskenkte beddegoed kan versier, familie kamers pragtig geverf om dit soos die huis te laat voel waar hul moes wegtrek, die “donkie” hart aan die stook gehou word om warm water te voorsien vir skoonmaak en bad tyd en daar vir ons deurentyd vertel word wat hul nog alles beplan.
Hierdie is voorwaar ‘n plek van liefde en hoop ten spyte van swaarkry en armoede en dit het ons net weer opreg dankbaar gemaak vir God se seën in ons lewens en hoe ons elke oomblik moet gebruik om te kan teruggee – dit mag dalk nie met geld wees nie, maar met alles wat ons al uitgebruik het – sal hierdie mense ‘n nuwe begin mee kan maak! En die belangrikste is die saam kuier en gesels.
Dus wil ons ‘n beroep op jul maak – enige iets wat jul dink onbruikbaar is – Gert en Alida ry gereeld Lochvaal toe en kan maklik goedjies daar gaan aflaai, anders maak ons dit ‘n groot uitreik van Brackendal se kant af en julle ry saam soontoe om goed af te laai – hierdie is ‘n uitreik wat deur ieder en elk ondersteun kan word en wil ons jul uitdaag om een Sondag-middag af te staan en vir Emfuleni Lochvaal Welsyn te gaan kuier – al vat jul nie goed soontoe nie – al reel jul net om ‘n koppie koffie en ‘n stukkie koek saam te gaan geniet – of om sop te gaan maak vir een maaltyd – of ‘n lekker braai te gaan hou – dink bietjie twee keer wanneer jy in die winkel inloop en net gou R300 spandeer – dit kon een maaltyd vir 800 mense verskaf het! Hul het plafonne in hul kamers nodig – hul het plantjies vir die groentetuin nodig – komberse, warm klere, noem maar op – niks sal te versmaai wees nie. Mag ons Jesus se oproep in ons lewens hoor en Sy voete en hande wees en gaan doen!
Groete
Jan en Sonja se Omgeegroep